Our Missions A luanciami Lai mi  khrih fa kan si nak zoh than hna usih  Missions a rak tuan tu hna an kut neh dawh sung hi fak pi in ruat than tuah hna usih! Hmual ngei mi annunnak tiang dih in a rak pe tu, Siangbawi nu le pa hna nun zia hi philh lo in kan Lai mi hna nih kan i ruah chih i zei tik hmanh ah  a thazang a der mi zong kan si lo nak hnga i Siangbawi nu le pa nunhar sung khan i cin ken in Laimi  kannun ah i thuam chih hna usih!  Siangbawi te Philhlonak (June 29, 2012)                     Chin Baptist Mission Lai mi kan sin ah a rak ra i an nun nak tiang a liam mi (American Baptist Siangbawi  te hmasabik)   Rev. Adoniram Judson & Ann Juson Rev. Judson thingkuang (American Baptist Historical Archives) Ann Judson nih nurse nu sin in a pasal sin biacah: “Ka saya cu a tlunnak ding can a sau tuk rih.  Keimah te lawng in maw ka thih ko ne lai.   Ka fanu te lawng in maw ka kaltaak ko ne lai.   Pathian duhnak a si bantuk in, a duhnak cu al lo in ka zulh ko lai.  Thih cu ka ttih lo.  Nain, hi tluk tuar har mi fahnak tuar khawh lo ding tu ka phang.  Ka saya cu ka zawtnak a fak tuk i ca ka ttial kho lo tiah rak ka chimh piak te ko kun law.” Dr. Judson cu a damlo ruangah USA lei tlun aa thawh.  Rili cung ah April 12, 1850 ni ah a nunnak cu a liam.  A ruak phum hmanh tawng lo in, rili pi chungah an paih.  Nga rawl ah aa cang. Lairam (Chin Hills) American Baptist Siangbawi hna hmanthlak   Rev. Arthur Carson & Laura Carson Lairam siangbawi hmasabik Rev. Arthur E. Carson & Mrs. Laura Carson cu March 15, 1899 ni ah Hakha khua an phan.  A hmasabik Chin Hills Baptist Association cu March 25, 1907 ah a thokpi hna. Arthur Carson cu April 1, 1908 ni ah a thi.  Laura Carson cu June 1920 tiang siangbawi rian a ttuan. Dr. Erik East & Emily East Dr. Erik East le Emily J. East cu March 21, 1902 ni ah Hakha khua an phan. Lairam ah sibawi rian a ttuan.  Khuate kip a tlawng.  Hakha khua ah siinn a ser. Mizaw thawng tampi a dam ter hna. Dr. East cu lungzawtnak (heart attack) a ngeih hnu ah October 1910 ah USA ah an kal tthan.   Dr. Joseph Cope & Elizabeth Cope  Dr. Joseph Herbert Cope & Elizabeth S. Cope cu December 21, 1908 ni ah Hakha an phan.  Tidim khua ah 1910 kum i an i tthial hlan ah Hakha holh kha a cawn i a thiam ngai.  Hakha,  Falam le Tidim holh kha a cawn i a thiam dih.  Sianginn cawn ding ca kha a ttial piak hna.  Dr. Cope cu Lakher Pioneer Mission of India ah a tlawn pah ah June 11, 1938 ni ah Hakha khua ah a thi. Dr. John G. Woodin & Bessie L. Woodin Dr. John G. Woodin & Bessie L. Woodin cu October 11, 1909 ni ah Hakha khua an phan.  Sibawi rian an ttuan.  An tuanbia hi a tlawm ngai.  February 22, 1915 ni ah USA ah an kal tthan. Rev. Chester U. Strait & Florence T. Strait Rev. Chester U. Strait & Florence T. Strait cu April 5, 1926 ni ah an fa le pahnih Betty le David he Hakha khua an phan.  Laimi nunning a niam tuk caah satil (tuu) zuatnak, chapiat siamnak le lakphak le kawfi kung cinnak kha an cawnpiak hna.  Rev. Strait nih Chin Hills Bible School cu Hakha khua ah May 1, 1928 ni ah a rak thok.  Bible le Hla kha an lehpi hna.  Hakha khua in December 1940 ah USA ah an kir tthan. Rev. Franklin O. Nelson & Phileda O. Nelson Rev. Franklin O. Nelson & Phileda O. Nelson cu December 2, 1939 ni ah Tidim khua an phan.  Bible Sianginn kha 1947 ah a tuahpi hna.  February 23, 1951 ni ah an ram ah an kir tthan. Rev. Dr. Robert G. Johnson & Elizabeth Johnson Rev. Robert G. Johnson & Elizabeth Johnson cu an fapa Richard Johnson (Deki) he May 30, 1946 ni ah Tidim khua an phan.  February 1947 ah Hakha khua ah an i tthial.  Hakha holh in Bible lehnak cu Rev. David Van Bik an ttuantti.  Siangbawinu zuamnak in Hakha hla cauk cu tonic solfa in an ttial.  Hakha ah Bible Sianginn kha an tuah i pastor ttuan ding in Lai pastor kha an cawnpiak hna.  Burmese Socialist Cozah nih ramdang siangbawi vialte kha 1966 kum ah an tthawl dih hna caah annih chungkhar zong USA ah an kir ve. Lairam ah Chin For Christ in One Century (CCOC) timi program cu 1983-1999 tiang Zomi Baptist Convention nih a rak tuah.  Lairam ah Baptist siangbawi te hmang in Thawngttha a phanhnak kum 100 a tlin kum 1999 ah Chinmi dihlak Khrih zumtu kan si dih lai tiin kum khat ah CCOC palai 100 lengmang an thlah.  Siangbawi te hna rianttuannak kha an peh.  Thlang Lairam ah Khrih Thawngttha cu an chim.  Chinmi thawng tampi cu khrihfa ah an cang. Hi Thawngttha chimnak ah nunnak a pe mi an um len.  Nungak Ngai Za Siam, 19 nih Phai khua thlang ah Khrih caah a nunnak a pek.  Ngaih a rak chia tuk.  Laimi nih tthawnnak ah kan hman.    CCOC Palai Saya Ni To, pastor of Thangzang nih hla a rak phuah: “Hawi dawt cheu khat hna cu Thawngttha chim manh lo, tlang khat lo tluang hra dan in mual a kan liam taak tawn. . . . Kan ngaihchiatnak te thisen luannak man cu kan co ttheu lai, Pathian remhmi inn kan tlun cun.”  “Khrih caah Lei khuaza Chin miphun” (Chins in the world for Christ) Hi catawi le tuan biatawi hi "online" ah ka rel i ka hmuh mi a si i a tha tuk! Kan Laimi mino hna nih kan theih awk hrim hrim a si ti ah ka ruah caah ka van share nak a si. Ka Lawm.